Varasöm framsetning á skilaboðum til Breta

Aðstandendur hópsins sem ætlar að senda Bretum skilaboð um að Íslendingar séu ekki hryðjuverkamenn eiga hrós skilið fyrir áræðni og framtakssemi.  Þjóðinni veitir ekki af allri hjálp sérstaklega í því að rétta ímynd sína við á erlendri grund.

En eitt ber þó að varast í framtakssemi þessa hóps og það er framsetning skilaboðanna: "Íslendingar eru ekki hryðjuverkamenn".

Grundvallaregla í ímyndarvinnu er að nota ekki þau orð sem maður vill ekki standa fyrir.  Sá sem vill ekki vera talin hryðjuverkamaður á ekki að nota það orð.  Hann á að nota það orð sem endurspeglar það sem hann vill standa fyrir.

Margir hafa flaskað á þessari reglu með döprum árangri, hér eru nokkur dæmi:

Dæmi 1:

Nixon sagði 1974 "I'm not a crook."  Hann vildi að þjóðin sín hugsaði "Our president is not a crook." en með þessu orðalagi sem hann valdi lét hann þjóðina hugsa: "Nixon er kannski ekki þrjótur hinn mesti en hann er örugglega töluverður þrjótur". 

Dæmi 2:

Ómar Ragnarsson, hinn geðþekki fjölmiðlamaður, bauð sig fram til Alþingis og gerði tilraun til að svara gagnrýnisröddum sem sögðu framboð Ómars grín.  Ómar birti auglýsingu með skilaboðunum: "Ég er ekki að grínast".  Þetta fékk fólk til að hugsa að hann líti kannski ekki á framboðið sem 100% grín en greinilega séu margir samt á þeirri skoðun að framboðið sé grín og því hlýtur það að vera að minnsta kosti dálítið grín.

Dæmi 3:

Ein af söngkonum söngflokksins Nylon sagði í forsíðufyrirsögn eitthvað á þessa leið á DV: "Við erum alls ekki heimskar" og var þá að ræða gáfnafar meðlima hljómsveitarinnar.  Svona fyrirsögn fær fólk til að tengja orðið "heimska" við meðlimi hljómsveitarinnar sem auðvitað var alls ekki ætlun viðkomandi í þessu tilviki. 

Og fjórða dæmið er nú hægt að taka af Íslendingum sem ekki vilja vera taldir hryðjuverkamenn:

 
  
  http://www.indefence.is/

Þetta fær þá sem þekkja málið ekki til hlítar að tengja orðið hryðjuverk við þjóðina Ísland.  Það er líklega það sísta sem við þurfum á að halda.  Þess vegna tel ég að þetta átak geri meira ógagn en gagn.

Talið frekar um það sem Íslendingar vilja standa fyrir, talið frekar um gallana í fari og hugsunarhætti þeirra Breta og útrásarmanna sem ýtt hafa undir núverandi stöðu. 

Breytið þessu orðalagi strax!